महागुरु फाल्गुनन्दको १४०औं जयन्तीमा ताङ्लेपामा फुटबल प्रतियोगिता, याङवरक र आयोजक टोली फाइनलमा

फालेलुङ।

पाँचथरको फालेलुङ-३, ताङ्लेपामा जारी पुरुष नकआउट फुटबल प्रतियोगिताको सेमिफाइनल खेलमा याङवरक गाउँपालिकाको नागी र आयोजक टोली ‘बि’फाइनलमा प्रवेश गरेका छन्।

राष्ट्रिय विभूति महागुरु फाल्गुनन्द लिङ्देनको १४०औं जन्म जयन्तीको अवसरमा आयोजित यस प्रतियोगिताको सेमिफाइनल खेल आज सम्पन्न भएको हो।

महागुरु फाल्गुनन्द लिङ्देन किरात समुदायका एक महान् समाज सुधारक, धर्मगुरु र राष्ट्रिय विभूति हुनुहुन्छ। उहाँले १९४२ सालमा जन्मनुभएको थियो। लिङ्देनले समाजमा व्याप्त अन्धविश्वास, विभाजन र अशिक्षाविरुद्ध अभियान चलाउनुभएको थियो। उहाँको शिक्षाले सत्य, परोपकार, आत्मसंयम र धार्मिक पालनाको मार्गदर्शन दिएको छ। पाँचथरको सिलौटीमा उहाँको पार्थिव शरीर राखिएको छ, जसलाई श्रद्धाका साथ सम्झना गरिन्छ।

ताङ्लेपामा आयोजित फूटबल प्रतियोगिता कात्तिक २१ गतेदेखि सुरु भएको हो, जसमा विभिन्न ठाउँका २० टोलीले सहभागिता जनाएको थियो। फाइनल खेल भोलि कात्तिक २६ गते दिउँसो १ बजे हुने आयोजकले जानकारी दिए। प्रथम स्थान हासिल गर्ने टोलीले नगद ८० हजार रुपैयाँसहित ट्रफी, मेडल र प्रमाणपत्र प्राप्त गर्नेछ भने उपविजेताले नगद ५० हजार रुपैयाँ, मेडल र प्रमाणपत्र प्राप्त गर्नेछ।

महागुरुको जन्म जयन्तीको अवसरमा ताङ्सेपा माङ्हिममा विशेष पूजाआजा गरिनुका साथै अतिथिहरूले महागुरु फाल्गुनन्द लिङ्देनको तस्वीरमा फूलमाला अर्पण गरी उहाँप्रति श्रद्धा प्रकट गरेका थिए। फालेलुङ युथ क्लबका अध्यक्ष रबिन केरुङका अनुसार यस अवसरमा लिम्बू समुदायको च्याब्रुङ, किरात राई समुदायको साकेला नाच, र गुरुङ समुदायको सोरठी नाचजस्ता विविध जातजातिका नृत्य प्रस्तुत गरिएको थियो, जसले स्थानीय कला, संस्कृति र सामुदायिक सहकार्यको प्रतिनिधित्व गरेको थियो।

विशेष समारोहमा प्रमुख अतिथि फालेलुङ गाउँपालिका प्रमुख वीरबिक्रम थाम्सुहाङ अन्य कार्यक्रमले गर्दा उपस्थित हुन सकेनन्। यद्यपि, वडा नं. ३ का अध्यक्ष शक्ति प्रसाद केरुङ, वडा नं. ४ का अध्यक्ष सन्तवीर राई, माओवादी केन्द्र पालिका कमिटीका अध्यक्ष वृद्धिमान सावदेन ‘विश्वास’, फालेलुङ रेडक्रसका अध्यक्ष जय प्रकाश बाँस्कोटालगायत अन्य विभिन्न राजनीतिक दलका प्रतिनिधि र संघसंस्थाका प्रतिनिधिहरूको उपस्थितिमा कार्यक्रम सम्पन्न भएको थियो।

यस विशेष मेलामा अतिथिहरूले महागुरुको योगदानको स्मरण गर्दै उहाँको तस्वीरमा फूलमाला चढाई श्रद्धा प्रकट गरेको र विभिन्न सांस्कृतिक कार्यक्रमले उत्सवलाई थप जीवन्तता प्रदान गरेको आयोजकले जानकारी दिएको छ।