सिलौटीमा महागुरु फाल्गुनन्दको ७६औँ स्मृति दिवसमा फुटबल प्रतियोगिता हुँदै

पाँचथर । फाल्गुनन्द गाउँपालिका–२ नाम्फुङयक सिलौटीमा प्रथम फाल्गुनन्द स्मृति मेला २०८१ तथा खुल्ला पुरुष नकआउट फुटबल प्रतियोगिता आयोजना हुने भएको छ।

साङसेन हाङसाम माङ्हिम सेवा समितिको आयोजनामा महागुरु फाल्गुनन्दको ७६औँ स्मृति दिवसको अवसरमा विविध कार्यक्रमसहित प्रतियोगिता सञ्चालन हुन लागेको हो। आयोजक समितिका अध्यक्ष रामकुमार नेम्बाङका अनुसार स्मृति दिवसलाई विशेष बनाउन किरात धर्म संरक्षण समिति मातहतका सेवा सावाहरुलाई सम्मान गरिनेछ। साथै, चैत्र १ गतेदेखि सञ्चालित लाधुङ सेमी सेवा तथा माङगेन्ना पूजाको समापन गरिनुका साथै धार्मिक प्रवचनसमेत हुनेछ।

कार्यक्रम चैत्र २२ गते सुरु भई चैत्र २६ गते सम्पन्न हुनेछ। प्रतियोगिताका विजेताले नगद रु ५० हजार, ट्रफी, मेडल र प्रमाणपत्र प्राप्त गर्नेछन् भने उपविजेताले नगद रु ३० हजारसहित ट्रफी, मेडल र प्रमाणपत्र प्राप्त गर्नेछन्। खेल अवधिभरको उत्कृष्ठ खेलाडीलाई समेत आकर्षक पुरस्कारको व्यवस्था गरिएको खेल व्यवस्थापक दीपक नेम्बाङले जानकारी दिनुभयो।

कार्यक्रममा नेपाल प्रज्ञा प्रतिष्ठानका पूर्व कुलपति बैरागी काइला (तिलविक्रम नेम्बाङ) प्रमुख अतिथिका रूपमा आमन्त्रित रहेको आयोजकले जनाएको छ।