फिदिममा वित्तीय साक्षरता तथा लगानीकर्ता सचेतना कार्यक्रम सम्पन्न

फिदिम।

पाँचथरको फिदिममा वित्तीय साक्षरता तथा लगानीकर्ता सचेतना अभिवृद्धि कार्यक्रम सम्पन्न भएको छ। मल्ल एण्ड मल्ल स्टक ब्रोकिङ कम्पनी फिदिम शाखाले विश्व वित्तीय सप्ताह (Global Money Week 2025) को अवसरमा उक्त कार्यक्रम आयोजना गरेको हो।

कार्यक्रममा फिदिम माद्यमिक विद्यालयका शिक्षक तथा कक्षा ११ र १२ मा अध्ययनरत विद्यार्थीहरूको सहभागिता रहेको थियो। प्राथमिक सेयर आवेदन प्रक्रिया तथा शेयर बजारका विभिन्न फाइदासम्बन्धी विषयमा मल्ल एण्ड मल्ल फिदिम र इलाम शाखाका इन्चार्ज दिपेन्द्र थेबले सहजीकरण गर्नुभएको थियो।

त्यस्तै, कार्यक्रममा प्राथमिक सेयर (IPO) तथा सेकेण्डरी सेयरसम्बन्धी जानकारी प्रदान गरिएको मल्ल एण्ड मल्ल फिदिम शाखाका प्रमुख अमिर शंकरले बताउनुभयो। कार्यक्रममा बोल्दै फिदिम माद्यमिक विद्यालयका शिक्षक हेमकृष्ण चापागाईंले विद्यार्थीहरूलाई प्राथमिक सेयर भर्नाले बचत गर्ने बानीको विकास हुने उल्लेख गर्नुभयो।

कार्यक्रमका प्रमुख अतिथि फिदिम माद्यमिक विद्यालयका प्रधानाध्यापक विनोद ठाकुरले विद्यालयमा यस्तो कार्यक्रम आयोजना गरी शिक्षक तथा विद्यार्थीलाई शेयर बजारसम्बन्धी ज्ञान प्रदान गरेकोमा मल्ल एण्ड मल्ल फिदिम शाखालाई धन्यवाद व्यक्त गर्नुभयो।

मल्ल एण्ड मल्ल फिदिम शाखाका प्रमुख अमिर शंकरको अध्यक्षतामा कार्यक्रम सम्पन्न भएको थियो।