सिदिङवा गाउँपालिका ‘पूर्ण खोप सुनिश्चितता दिगोपना’ पालिका घोषणा

सिदिङवा, ताप्लेजुङ ।
सिदिङवा गाउँपालिका अब ‘पूर्ण खोप सुनिश्चितता दिगोपना’ पालिका बनिसकेको छ। यससँगै, सिदिङवा गाउँपालिका कोशी प्रदेशका १३ स्थानमा पूर्ण खोप सुनिश्चित गर्ने गाउँपालिका बनेको छ भने ताप्लेजुङ जिल्लाको पहिलो गाउँपालिका पनि बनेको हो।

गाउँपालिकाले जन्मेदेखि ५९ महिना उमेर समूहका सबै बालबालिकालाई विश्व स्वास्थ्य सङ्गठनले तोकेका सबै खोपका मात्रा पूरा गरी यो घोषणा गरेको हो। यस घोषणाले खोपको माध्यमबाट रोगको रोकथाम, निवारण र उन्मुलन गर्दै शिशु, बाल, मातृ तथा अन्य व्यक्तिको मृत्युदर घटाउने उद्देश्य लिएको छ। यसैगरी, खोप सेवाको विस्तार र सुदृढीकरण गरी गुणस्तरीय खोप सेवा निरन्तरता दिने प्रतिबद्धता व्यक्त गरिएको छ।

गाउँपालिका कार्यालयको अनुसार, सिदिङवा गाउँपालिकामा १६ देखि ५९ महिना उमेरका ६ सय ४० बालबालिका रहेका छन्, जसका सबैलाई खोपका सबै मात्रा दिइसकेका छन्। यस्तै, जन्मेदेखि १५ महिना उमेर समूहका बालबालिकालाई पनि मापदण्डअनुसार खोप प्रदान गरिएको स्वास्थ्य शाखा प्रमुख प्रदिप शाहाले जानकारी दिए।

गाउँपालिका अध्यक्ष मानबहादुर राईले भने, “चेतनाको कमी भएका समुदायमा घर घर पुगेर अभियान चलाउने क्रममा यो सफलता हासिल गर्न सकिएको हो।” उनले सिदिङवा गाउँपालिकाले हरेक नागरिकलाई स्वस्थ राख्न र स्वास्थ्य सेवा सहज बनाउनका लागि निरन्तर प्रयास गर्ने बताए।

सिदिङवा गाउँपालिकाका उपाध्यक्ष बन्दना कडरियाले पूर्ण खोप सुनिश्चितता दिगोपना पालिका घोषणा गर्नका लागि सहयोग गर्ने सबैलाई आभार व्यक्त गर्दै, स्वास्थ्यकर्मी र महिला स्वास्थ्य स्वयंसेविकाको आवश्यक माग पूरा गर्न पालिका प्रतिबद्ध रहेको बताइन्।

गाउँपालिकामा भएको घोषणामा विभिन्न वडाका अध्यक्ष, कार्यपालिका सदस्य, र प्रमुख प्रशासकीय अधिकृत विकास वि.क. लगायतका व्यक्तिहरू उपस्थित थिए।