फालेलुङमा आठौँ चौरी महोत्सव, चैत्र ३१ देखि वैशाख २ सम्म

फालेलुङ, पाँचथर । आठौँ फालेलुङ चौरी पर्यटन महोत्सव २०८२ आगामी चैत्र ३१ गतेदेखि फालेलुङ गाउँपालिका वडा नं. ४ स्थित चारराते क्षेत्रमा सुरु हुनेभएको छ। यो महोत्सव वैशाख २ गतेसम्म सञ्चालन हुनेछ। महोत्सवको जानकारी आयोजकले चैत्र १५ गते फिदिममा आयोजित पत्रकार सम्मेलनमा सार्वजनिक गरेका छन्।

यस महोत्सवको मुख्य आयोजक फालेलुङ गाउँपालिका र आयोजनामा फालेलुङ कञ्चनजङ्गा पर्यटकीय प्रवर्द्धन संस्था, दिप ज्योति युवा क्लब र कञ्चनजङ्घा चौरी पालन तथा संरक्षण संस्था पाँचथर रहेका छन्। महोत्सवको उद्देश्य प्राकृतिक र जैविक विविधतासँग जोडिएको सिमाक्षेत्र पर्यटनबाट नेपाल र नेपालीलाई फाइदा पुर्याउने र राष्ट्रिय अर्थतन्त्रमा योगदान पुर्याउने हो।

महोत्सवले लोपोन्मुख चौरी, रेडपाण्डा संस्कृतिको संरक्षण गर्दै जैविक विविधताको संरक्षण गर्न, उच्च पहाडी क्षेत्रको पर्यावरण सन्तुलन कायम गर्न, नेपाली अर्गानिक मौलिकताको ब्राण्ड निर्माण गर्न र विश्व पर्यटन बजारलाई आकर्षित गर्नका लागि कार्यक्रम आयोजना गरिएको छ। यसका साथै, पर्यावरणीय पर्यटनको माध्यमबाट स्थानीय समुदायको दिगो जीविकोपार्जनमा सहयोग पुर्याउने उद्देश्य राखेको आयोजक डिल्ली प्रसाद केरुङले बताए ।

फालेलुङ गाउँपालिकाका उपाध्यक्ष महेन्द्रहाङ जवेगुले महोत्सवका मुख्य उद्देश्यहरूलाई जनाउँदै, यो महोत्सव नेपाली समुदाय र पर्यटकीय क्षेत्रको लागि महत्वपूर्ण अवसर हुने बताए। महोत्सवमा याक डान्स र झाँकी प्रदर्शन, १५ सयभन्दा धेरै याक चौंरीको प्रदर्शनी, चौरीपालकहरूको हुर्कुत पड्काउने, डोरी तान्ने, मैत्रिपूर्ण फुटबल खेल, छेलो हान्ने, सम्मान कार्यक्रम र चर्चित हाँस्य कलाकार तथा जादुगर शेरबहादुर गुरुङको सांस्कृतिक कार्यक्रम पनि समावेश हुनेछ।

यश महोत्सव २०७४ सालदेखि एसियामा नै पहिलोपटक नेपालमा सुरु भएको थियो ।