फिदिम, पाँचथर।
पाँचथरको फिदिमस्थित पाँचथर अस्पतालमा चैत ४ गतेदेखि ९ गतेसम्म सञ्चालन गरिएको निःशुल्क हाडजोर्नी शल्यक्रिया शिविर सम्पन्न भएको छ।
फिदिम नगरपालिकाको आयोजनामा भएको उक्त शिविरमा पाँचथर सहित ताप्लेजुङ, तेह्रथुम, इलाम र झापाबाट बिरामीहरू सहभागी भएका थिए। शिविरमा हड्डी भाँचिएको, स्टिल निकाल्नुपर्ने वा राख्नुपर्ने लगायतका सम्पूर्ण हाडजोर्नीसम्बन्धी उपचार गरिएको थियो। ताप्लेजुङबाट आएका सूर्यबहादुर लिम्बूले चार वर्षअघि खुट्टामा स्टिल हालिएको थियो, जुन उनले यसै शिविरमा निःशुल्क हटाउन पाएकोमा अत्यन्त उत्साहित भएको बताए।
शिविरमा १३ सयभन्दा धेरैले सेवा लिएका थिए भने १ सयभन्दा धेरै बिरामीको शल्यक्रिया गरिएको नेपाल अपांग संघ, काठमाडौँका प्रमुख डा. कैलास कुमार भण्डारीले जानकारी दिए। प्रविधिक सहयोग नेपाल अर्थोपेडिक अस्पताल, जोरपाटी, रोटरी क्लब अफ काठमाडौं, तथा नेपाल अपांग संघ, काठमाडौँले गरेको थियो।
फिदिम नगरपालिकाले यसअघि पनि स्वास्थ्यसम्बन्धी निःशुल्क शिविर आयोजना गर्दै आएको छ। नगरप्रमुख मित्रप्रसाद काफ्लेले शिविरमा आएका धेरै बिरामी समय अभावका कारण सेवा लिन नपाएको र उनीहरूलाई पाँचथर अस्पतालमै निःशुल्क सेवा दिने वातावरण तयार गर्ने बताए।
शिविरको समापनपछि चैत १० गते बिहान फिदिम नगरपालिकाले प्रविधिक सहयोगका लागि काठमाडौंबाट आएका २३ जना चिकित्सकलाई बिदाइ गर्दै धन्यवाद ज्ञापन गरेको थियो। नगरपालिकाले आगामी वर्ष पनि स्वास्थ्यसम्बन्धी निःशुल्क शिविर सञ्चालन गर्ने जनाएको छ।
नगरपालिकाका उपप्रमुख राधाकृष्ण न्यौपानेका अनुसार आर्थिक अभावका कारण उपचार गर्न नसकेका बिरामीहरूका लागि शिविर लाभदायक बनेको छ। जनसेवा समाज पाँचथर र हेल्प टुगेदर फाउन्डेसन पाँचथरको समेत सहकार्यमा सञ्चालन गरिएको यस शिविरबाट धेरै नागरिक लाभान्वित भएका छन्। जनसेवा समाज पाँचथरका अध्यक्ष राजेन्द्र अधिकारीले पनि यस शिविरले नागरिकहरूलाई ठूलो राहत दिएको बताए।
यो खबर पढेर तपाईलाई कस्तो महसुस भयो ?
खुशी
०%
०%
अचम्म
०%
०%
उत्साहित
०%
०%
दुखी
०%
०%
आक्रोशित
०%
०%
