फिदिम नगरपालिका वडा नं. ७ र ८ लाई पूर्ण खोप वडा घोषणा

फिदिम।

फिदिम नगरपालिका वडा नं. ७ र ८ लाई आज एक समारोहका बीच पूर्ण खोप वडा घोषणा गरेका छन् ।

फिदिम नगर पालिकाका नगर प्रमुख मित्र प्रसाद काफ्लेले स्वास्थ्य चौकी फिदिम ८ घुमाउनेटारको सभाहलमा आयोजित एक कार्यक्रमका बीच प्रमुख अतिथिका रूपमा पूर्ण खोप सुनिश्चितता वडा घोषणा गर्नु भएको हो।

फिदिम नगर पालिका अन्तर्गतका ० देखि १५ महिनासम्मका बालबालिका मध्ये वडा नं. ७ मा ३८ जना र वडा नं. ८ मा ४९ जना गरी ८७ जना बालबालिका रहेका छन्, जसमा सबैले खोप प्राप्त गरेका छन्। त्यसैले यी दुई वडालाई पूर्ण खोप वडा घोषणा गरिएको हो।

पूर्ण खोप वडा घोषणा गर्दै प्रमुख अतिथि नगर प्रमुख काफ्लेले यस क्षेत्रका महिला स्वयम् सेविका, स्वास्थ्य कर्मचारी र अन्य सरोकारवाला पक्षहरूको सहयोगबाट पूर्ण खोप वडा घोषणा गर्न पाएकोमा उनीहरूको धन्यवाद व्यक्त गर्दै नगर पालिका भित्रका स्वास्थ्य चौकीहरू र आधारभूत स्वास्थ्य केन्द्रमा औषधिको अभाव हुन नदिने प्रतिबद्धता व्यक्त गर्नुभयो। उहाँले स्वास्थ्य कर्मीलाई यसको व्यवस्थापनमा पूर्ण रूपमा लाग्न निर्देशन दिनुभयो।

नगर प्रमुख काफ्लेले थप जानकारी दिँदै भने, “नगर पालिका भित्रका लक्षित वर्गका विरामीहरूलाई अस्पतालसम्म पुर्याउन नगर पालिकाले निःशुल्क एम्बुलेन्स सेवा उपलब्ध गरिरहेको छ। साथै, जिल्ला बाहिरका विरामीलाई थप उपचारका लागि जाने क्रममा कुल भाडामा २० प्रतिशत छुट पनि दिइन्छ।”

नगर प्रमुख काफ्लेले फिदिम नगर पालिकामा स्थायी बसोबास गर्ने व्यक्तिको मृत्यूपछि काजक्रिया खर्चको रूपमा दश हजार रुपैयाँ र समवेदना पत्र प्रदान गर्ने कार्य पनि भइरहेको जानकारी दिनुभयो।

सो कार्यक्रममा वडा नं. ७ का वडा सदस्य भीमा कुमारी दुलाल बाँस्कोटा, वडा नं. ८ का वडा सदस्य द्वय प्रेम बहादुर गुरुङ र नन्दमाया विकको विशेष आतिथ्यता थियो। फिदिम नगर पालिका स्वास्थ्य शाखा प्रमुख ओम प्रकाश यादवले कार्यक्रमको उद्देश्यबारे जानकारी गराएका थिए। नेपाल रेडक्रस सोसाइटी उपशाखा रानीटारका सभापति पर्शुराम अधिकारी, पंचकन्या आधारभूत विद्यालयका प्रधानाध्यापक राम प्रसाद बाँस्कोटा लगायतले कार्यक्रमको सफलताको शुभकामना व्यक्त गरेका थिए।

वडा नं. ८ का वडा अध्यक्ष सोम कुमार गुरुङको अध्यक्षतामा सम्पन्न सो कार्यक्रमको संचालन स्वास्थ्य चौकी घुमाउनेटारका प्रमुख संगीता गुप्ता तेलीले गर्नुभएको थियो। सो कार्यक्रममा विभिन्न विद्यालयका प्रधानाध्यापक, शिक्षक, समाजसेवी र स्वयम् सेविकाहरूको उपस्थिती रहेको थियो।

सम्पूर्ण कार्यक्रम फिदिम नगर पालिका स्वास्थ्य शाखाको आयोजनामा सम्पन्न भएको हो।