पाँचथरमा छायांकन भएको ‘ऊनको स्विटर’ मिति सार्बजनिक

काठमाडौँ । अभिनेता विपिन कार्की र मिरुना मगरको शीर्ष भूमिका रहेको फिल्म ‘ऊनको स्विटर’को सोमबार नयाँ पोस्टर सार्वजनिक गर्दै वैशाख २६ लाई प्रदर्शन मिति तोकिएको छ । ग्रामीण परिवेशको झल्को दिने उक्त पोस्टरमा ऊनको स्विटर लगाएर हातमा डायरीसहित डोको बोकिरहेका विपिनले ‘को–एक्टर’ मिरुनालाई मन्द मुस्कान दिइरहेका छन्।

फिल्ममा विपिन र मिरुनासहित सुनिल पोखरेल, माओत्से गुरुङ, विल्सनविक्रम राई, प्रेम सुब्बा, एलेक्स पारस, परीक्षा लिम्बू, सुरज तमु, शारदा देवी सिलवाल, भावना खपांगी मगरलगायतको अभिनय रहेको छ । नवीन चौहानको पहिलो निर्देशन तथा लेखन रहेको ‘ऊनको स्विटर’ लाई चिन्तन राजभण्डारीले पाँचथर र भारतीय सीमासँग जोडिएको नेपाली भूमि फालेलुङमा खिचेका हुन् ।

यसअघि नै सार्वजनिक यस फिल्मको गीत ‘फूल’ ले राम्रो प्रशंसा बटुलिसकेको छ । सुजन चापागार्इं संगीत निर्देशक रहेको फिल्मका गीतलाई हर्क साउद र युवराज कार्कीले लेखेका हुन् । यस फिल्मलाई आर्टमान्डुले निर्माण गरेको हो । ekantipur