अढाई दशकअघिको प्रेमकथा समेटिएको साङ्गितिक चलचित्र ‘आजुनी माया’ सार्वजनिक (भिडियो सहित)

 पाँचथर । निर्देशक बिक्रम योङ्हाङको निर्देशनमा तयार पारिएको साङ्गितिक चलचित्र ‘आजुनी माया’ सार्वजनिक भएको छ।

अढाई दशकअघिको प्रेमकथा प्रस्तुत गर्ने यो चलचित्र लिम्बू संस्कृतिमा आधारित छ, जसमा प्रेम, विवाह, रीतिरिवाजलाई प्रस्ट्याउन खोजिएको छ। निर्देशक योङ्हाङका अनुसार चलचित्रले अढाई दशकअघिको समयको एक अनौठो प्रेमकथालाई पर्दामा जीवित पार्ने प्रयास गरेको छ।

‘आजुनी माया’ चलचित्रको गीतमा गायक शाहिल लिम्बू र सम्झना योङ्हाङको स्वर रहेको छ। गीतको शब्द सागर केरुङले लेखेका हुन् भने संगीत गायक लिम्बू आफैले दिएका छन्। चलचित्रमा युगल लिम्बू, सब्नम इजम लिम्बू, फुङ्सो जबेगु, रमिता राई र अबि राईको प्रमुख अभिनय रहेको छ, जसले कथालाई जीवन्त बनाएको छ।

चलचित्रको छायांकन पाँचथरका विभिन्न रमणीय स्थलहरूमा गरिएको हो, जसको छायांकन भुपेन योङ्हाङले गरेका हुन्। चलचित्रको सम्पादन अर्जुन खड्काले गरेका हुन् भने निर्माण निर्देशक बिक्रम योङ्हाङले आफैँ गरेका हुन्।

‘आजुनी माया’ साङ्गितिक चलचित्र सेप्माङ फिल्म्सको युट्युब च्यानलमार्फत सार्वजनिक गरिएको छ, जसले स्थानीय सांस्कृतिक रीतिरिवाजलाई अन्तर्राष्ट्रिय दर्शकसम्म पुर्‍याउने उद्देश्य राखेको कलाकार फुङ्सो जबेगूले बताए ।
भिडियो हेर्नुस् —-