पाँचथरमा चोरी र लागुऔषधको घटनामा संलग्न २ जना पक्राउ

पाँचथर । पाँचथरको फिदिममा चोरी गरेको आरोपमा झापाका रुपेश न्यौपानेलाई प्रहरीले पक्राउ गरेका छन् ।

बुधबार बिहान २:३० बजे फिदिम नगरपालिका वडा नं. १ चौतारी लाईनमा रहेको मोहन प्रसाद बाँस्कोटाको घरबाट नगद र सुनका गरगहनासहितको धनमाल चोरी भएको सूचनाका आधारमा जिल्ला प्रहरी कार्यालय पाँचथरको टोलीले छानबिन सुरु गरेको थियो।

प्रमुख प्रहरी निरीक्षक रुपेश तामाङको नेतृत्वमा अनुसन्धान टोली घटनास्थलमा पुग्दा घरको कोठामा दराजमा राखिएका नगद र सुनका गरगहनाहरू चोरी भएको पाइएको थियो। चोरीमा संलग्न व्यक्तिहरूको खोजी गर्दा, झापा जिल्ला बुद्धशान्ति गाउँपालिका वडा नं. २ का २० वर्षीय रुपेश न्यौपानेलाई फिदिम-१ स्थित शंकास्पद अवस्थामा फेला पारेर नियन्त्रणमा लिइएको जिल्ला प्रहरी कार्यलय पाँचथरको सूचना अधिकारी जानकरी दिएको छ।

न्यौपानेलाई थप अनुसन्धानका लागि जिल्ला प्रहरी कार्यालयमा राखिएको छ।

लागुऔषधसहितको गिरफ्तारी

त्यस्तै, फिदिम नगरपालिका वडा नं. ७ का २५ वर्षीय राम बहादुर लिम्बुलाई लागुऔषध ब्राउन सुगर खरिद-बिक्री गर्ने सूचनाका आधारमा खोजी गर्दै जाँदा बिहिवार दिउँसो ४ बजे फिदिम-२ पल्लोटार स्थित शंकास्पद अवस्थामा फेला पारेर नियन्त्रणमा लिइएका छन्।

लिम्बुको शरीर र बस्ने कोठामा खानतलासी गर्दा लुकाइएको ब्राउन सुगर समेत फेला परेको जिल्ला प्रहरीले जानकारी दिए।

लिम्बुलाई थप अनुसन्धानका लागि जिल्ला प्रहरी कार्यालय पाँचथरमा राखिएको छ।