क्षयरोग मुक्त अभियानका लागि वडा स्तरीय योजना निर्माणको प्रगति विश्लेषण

फिदिम।

फिदिम ८ स्थित स्वास्थ्य चौकी भवनमा सोमबार क्षयरोग मुक्त अभियान कार्यक्रमको लागि वडा स्तरीय सूक्ष्म योजना निर्माणको प्रगति विश्लेषण तथा पुनः योजना निर्माण सम्बन्धी कार्यक्रम सम्पन्न भएको छ।

यस कार्यक्रमको उद्देश्य क्षयरोगीहरूको पहिचान र खोजी गरेर उनीहरूको उपचार गर्ने र त्यस्ता रोगबाट बचाउने हो। फिदिम नगर पालिका वडा नं. ७ र ८ मा क्षयरोगीहरूको संख्या घटाउने र यस क्षेत्रमा हुने सम्भावित रोगको पहिचान गरी तथ्याङ्क संकलन गरेर चैत्र महिना भित्र निःशुल्क स्वास्थ्य परीक्षण शिविर सञ्चालन गर्ने र क्षयरोगीहरूको उपचार गरी थप जोखिमबाट बचाउने योजना बनाइएको छ। यस बारेमा फिदिम नगर पालिका स्वास्थ्य शाखाका प्रमुख ओम प्रकाश यादवले जानकारी दिनुभयो।

फिदिम नगर पालिका स्वास्थ्य शाखाका स्वास्थ्य कर्मी विजेता खतिवडाले सहजीकरण गरेको सो कार्यक्रममा फिदिम नगर पालिका वडा नं. ७ का वडा सदस्य भीमा कुमारी दुलाल, वडा नं. ८ का वडा अध्यक्ष सोम कुमार गुरुङ, वडा सदस्य नन्दमाया विक, विभिन्न विद्यालयका प्रधानाध्यापक एवं शिक्षक, समाजसेवी, स्वयम् सेविका लगायत २५ जनाले सहभागिता जनाउनुभएको थियो।