पाँचथर। पाँचथरका विभिन्न स्थानमा बिहीबार लागेको डडेलो र आगलागीका घटनामा परी दुई जनाको मृत्यु भएको छ।
मृत्यु हुनेमा कुम्मायक गाउँपालिका-३ की २२ वर्षीया प्रतिमा सम्बाहाफे र फिदिम नगरपालिका-१४ की ४७ वर्षीया उषा नेम्बाङ राई रहेका छन्। सम्बाहाफेको उपचारका लागि धरान लैजाने क्रममा धनकुटाको भेडेटारमा मृत्यु भएको हो। उनी कुम्मायकको ताम्राखु भन्ने जंगलमा लागेको डडेलोमा परेर गम्भीर घाइते भएकी थिइन्।
त्यस्तै, फिदिम नगरपालिका-१३ र १४ को सीमामा लागेको डडेलोका कारण गम्भीर घाइते भएकी उषा नेम्बाङ राईको उपचारका क्रममा मृत्यु भएको हो। उनलाई काठमाडौं लैजाने क्रममा सिन्धुलीमा निधन भएको पारिवारिक स्रोतले जनाएको छ। घर फर्कने क्रममा दाउरा बोकेर हिँड्दा उनलाई डडेलोले समातेको थियो। पाँचथर जिल्ला अस्पतालमा प्रारम्भिक उपचारपछि थप उपचारका लागि काठमाडौं रेफर गरिएको थियो।
घटनामा परी २८ वर्षीया सविना सम्बाहाफे, ११ वर्षीया शिवाना सम्बाहाफे र ६० वर्षीया निरमाया सम्बाहाफे गम्भीर घाइते भएका छन्। उनीहरूलाई उपचारका लागि धरानस्थित विपी कोइराला स्वास्थ्य विज्ञान प्रतिष्ठान लगिएको छ।
डडेलो नियन्त्रणका लागि खटिएका ३१ वर्षीय खगेन्द्र विक लडेर घाइते भएका छन्।
यसैबीच, जिल्ला प्रहरी कार्यालय पाँचथरका अनुसार बिहीबार दिनभर विभिन्न स्थानमा आगलागी तथा डडेलोका घटनाहरू भएका छन्। पछिल्ला केही दिनयता जिल्लाका विभिन्न ठाउँमा डडेलो लागिरहेको छ। जिल्ला प्रहरी कार्यालयका प्रहरी नायब उपरीक्षक (डीएसपी) बुढाथोकीका अनुसार जंगलमा आगो लगाउने तीन जनालाई पक्राउ गरी कानुनी कारबाही अघि बढाइएको छ।
यो खबर पढेर तपाईलाई कस्तो महसुस भयो ?
खुशी
०%
०%
अचम्म
०%
०%
उत्साहित
०%
०%
दुखी
०%
०%
आक्रोशित
०%
०%
