फालेलुङ–४ मेमेङमा महिला मिनि म्याराथन हुने

पाँचथर । पाँचथरको फालेलुङ गाउँपालिका–४ मेमेङमा पालिका स्तरीय खुला महिला मिनि म्याराथन आयोजना हुने भएको छ। पुसेमेलाको अवसरमा पौष ९ गते प्रतियोगिता सञ्चालन गर्न लागिएको म्याराथन सम्पर्क रत्न थाम्सुहाङले जानकारी दिनुभयो।

तीनसिमाना जनसेवा समाज नेपाल मेमेङको आयोजनामा हरेक वर्ष किरात गणतान्त्रिक खेलमैदानमा फुटबल प्रतियोगिता र भव्य मेला हुँदै आएको छ। यस वर्ष सोही अवसरलाई विशेष बनाउँदै महिला मिनि म्याराथन समेत समावेश गरिएको आयोजक समितिले जनाएको छ।

फालेलुङ क्षेत्रका खेलकुद प्रतिभालाई चिनाउने र महिला खेलाडीहरूलाई प्रोत्साहन गर्ने उद्देश्यले आयोजना गरिएको म्याराथनमा पालिका भित्रका जुनसुकै उमेर समूहका महिला सहभागी हुन पाउनेछन्। पछिल्लो समय फालेलुङमा यस्ता दौड प्रतियोगिता बढ्दै गइरहेको र यसले पर्यटन क्षेत्रमा पनि सकारात्मक प्रभाव पारेको फालेलुङ–४ का वडाध्यक्ष सन्तविर राईले बताउनुभयो।

म्याराथनमा प्रथम हुने खेलाडीले नगद १५ हजार, द्वितीयले १० हजार र तृतीयले ५ हजार रुपैयाँसहित ट्रफी, मेडल र प्रमाणपत्र प्राप्त गर्नेछन्। प्रतियोगिताको दूरी १० किलोमिटर रहेको छ, जसको मार्ग किरात गणतान्त्रिक खेलमैदानबाट सुरु भई थाप्ली–सिर्लिङ्गी टार हुँदै पुनः खेलमैदानमै समाप्त हुने बताइएको छ।