सेवारो युवा जमातद्वारा पहिरो प्रभावितलाई आर्थिक सहयोग

फालेलुङ, पाँचथर।

फालेलुङ गाउँपालिका–७ पापुन्देनको सेवारो युवा जमातले पहिरो प्रभावित परिवारलाई आर्थिक सहयोग प्रदान गरेको छ।

२०८१ सालको तिहारमा देउसी–भैलो नाचबाट संकलन गरिएको रकमबाट फालेलुङ–६ का चार अति प्रभावित परिवारलाई प्रतिपरिवार ७ हजार ५ सयको दरले ३० हजार रुपैयाँ सहयोग गरिएको हो। सहयोग फालेलुङ–६ को वडा सरकारको सिफारिशमा हस्तान्तरण गरिएको जमातका सचिव पारस आङ्बोले जानकारी दिए।

सहयोग हस्तान्तरण कार्यक्रम जमातका अध्यक्ष रोहित आङ्बोको अध्यक्षतामा सम्पन्न भएको थियो। प्रमुख अतिथि फालेलुङ गाउँपालिकाका अध्यक्ष वीरबिक्रम थाम्सुहाङले जमातको योगदानको प्रशंसा गर्दै सहकार्यका लागि धन्यवाद व्यक्त गरे। कार्यक्रममा जमातका कलाकार र सहयोगी व्यक्तिहरुलाई पनि सम्मान गरियो।

सामाजिक एकता र विपद् व्यवस्थापनमा सेवारो युवा जमातले देखाएको यो पहल अनुकरणीय रहेको सहभागीहरूले बताए।